مقتطفات

أكيد لاحظتوا من العنوان إن دة مش موضوع واحد يربطه خيط درامي محكم , إنما كذا موضوع , أو كذا حاجة عايزة أقولهم

• أولا أحب أقول للباشمهندس أشرف عود أحمد , ويارب يكتب هنا كمان علي أساس إن دي كمان مدونته ولو ما كتبش فيها هاتزعل , دة غير إن لكل مدونة جمهورها وجمهور كلنا واحد في انتظار مشاركات الأب الروحي للمدونة .
• ثانيا من نفس المنطلق عايزة أسأل أو أتساءل أين الباشمهندسة ندي عبد الغني ؟؟؟ حاسة إني مفتقداها سواء هنا أو علي جروب النقابة لأني لم أتعود علي غيابها كل هذه المدة دون مشاركات , يارب بس تكوني بخير يا باشمهندسة ندي , ونقرأ مشاركاتك قريبا إن شاء الله
• ثالثا , ودة مالوش أي علاقة بأولا أو ثانيا , كنت عايزة أسأل كل الناس هنا إيه أحسن لعبة علي الكمبيوتر بيحبوها واعتقدوا إنها ممتعة جدا بالنسبة ليهم , واللي مهما لعبوا من ألعاب هاتفضل دي أحسن لعبة من وجهة نظرهم ؟؟؟ بالنسبة لي أفضل لعبة لعبتها وحبيتها واعتقد إنها ممتعة عشان بتخليني أفكر كويس قبل أي خطوة هاخطوها , لعبة minesweeper . ياتري إنتوا إيه ألعابكم المفضلة؟؟
• رابعا , بعد انتهاء الخمس سنين أشغال شاقة في سجن الهندسة , تعلمت حاجة مهمة جدا , وهي إن معرفة الناس كنوز .
• خامسا , كما نعرف جميعا .. فإن بداخل كل منا طفل صغير يتخفي خلف قناع النضج الذي نرسمه علي وجوهنا , ولكن اكتشفت أن ألذ حاجة في الدنيا إننا نعطي هذا الطفل فرصته في الظهور والتحكم فينا من فترة لأخري , لأن هذا الطفل هو ما تبقي لدينا من براءة وجنون ونشاط وسعادة حقيقية , فأطلقوا العنان للأطفال الصغيرة بداخلكم .. واتجننوا شوية , مش كل الحياة عُقَد وكلاكيع وكآبة
• سادسا زمانكم زهقتوا مني , طبعا بهزر عشان انا مايتزهقش مني أصلا مش كدة , أكيد دلوقتي بتهزأ من كل واحد وواحدة بيقرأوا الكلام دة , يستحسن إني أسكت بقي قبل ما تغتالوني .

فدوى نزار

http://sotourfadwa.blogspot.com